זכריה פרק יב - פסוקים בטעמים ופירוש משולב

זכריה פרק יב: מַשָּׂ֥א דְבַר יְהֹוָ֖ה עַל יִשְׂרָאֵ֑ל נְאֻם יְהֹוָ֗ה נֹטֶ֤ה שָׁמַ֙יִם֙ וְיֹסֵ֣ד אָ֔רֶץ וְיֹצֵ֥ר רֽוּחַ אָדָ֖ם בְּקִרְבּֽוֹ׃

הפסוקים

א. מַשָּׂ֥א דְבַר יְהֹוָ֖ה עַל יִשְׂרָאֵ֑ל נְאֻם יְהֹוָ֗ה נֹטֶ֤ה שָׁמַ֙יִם֙ וְיֹסֵ֣ד אָ֔רֶץ וְיֹצֵ֥ר רֽוּחַ אָדָ֖ם בְּקִרְבּֽוֹ׃

ב. הִנֵּ֣ה אָ֠נֹכִ֠י שָׂ֣ם אֶת יְרוּשָׁלִַם סַף רַ֛עַל לְכׇל הָעַמִּ֖ים סָבִ֑יב וְגַ֧ם עַל יְהוּדָ֛ה יִהְיֶ֥ה בַמָּצ֖וֹר עַל יְרוּשָׁלִָם׃

ג. וְהָיָ֣ה בַיּוֹם הַ֠ה֠וּא אָשִׂ֨ים אֶת יְרוּשָׁלִַם אֶ֤בֶן מַֽעֲמָסָה֙ לְכׇל הָ֣עַמִּ֔ים כׇּל עֹמְסֶ֖יהָ שָׂר֣וֹט יִשָּׂרֵ֑טוּ וְנֶאֶסְפ֣וּ עָלֶ֔יהָ כֹּ֖ל גּוֹיֵ֥י הָאָֽרֶץ׃

ישועת ירושלים ביום המלחמה: אלופי יהודה ככיור אש והשמדת הגויים הצרים

ד. בַּיּ֨וֹם הַה֜וּא נְאֻם יְהֹוָ֗ה אַכֶּ֤ה כׇל סוּס֙ בַּתִּמָּה֔וֹן וְרֹכְב֖וֹ בַּשִּׁגָּע֑וֹן וְעַל בֵּ֤ית יְהוּדָה֙ אֶפְקַ֣ח אֶת עֵינַ֔י וְכֹל֙ ס֣וּס הָעַמִּ֔ים אַכֶּ֖ה בַּעִוָּרֽוֹן׃

ה. וְאָ֥מְר֛וּ אַלֻּפֵ֥י יְהוּדָ֖ה בְּלִבָּ֑ם אַמְצָ֥ה לִי֙ יֹשְׁבֵ֣י יְרוּשָׁלִַם בַּיהֹוָ֥ה צְבָא֖וֹת אֱלֹהֵיהֶֽם׃

ו. בַּיּ֣וֹם הַה֡וּא אָשִׂים֩ אֶת אַלֻּפֵ֨י יְהוּדָ֜ה כְּֽכִיּ֧וֹר אֵ֣שׁ בְּעֵצִ֗ים וּכְלַפִּ֥יד אֵשׁ֙ בְּעָמִ֔יר וְאָ֨כְל֜וּ עַל יָמִ֧ין וְעַל שְׂמֹ֛אול אֶת כׇּל הָעַמִּ֖ים סָבִ֑יב וְיָשְׁבָ֨ה יְרוּשָׁלַ֥͏ִם ע֛וֹד תַּחְתֶּ֖יהָ בִּירוּשָׁלָֽ͏ִם׃

ז. וְהוֹשִׁ֧עַ יְהֹוָ֛ה אֶת אׇהֳלֵ֥י יְהוּדָ֖ה בָּרִֽאשֹׁנָ֑ה לְמַ֨עַן לֹֽא תִגְדַּ֜ל תִּפְאֶ֣רֶת בֵּית דָּוִ֗יד וְתִפְאֶ֛רֶת יֹשֵׁ֥ב יְרוּשָׁלִַם עַל יְהוּדָֽה׃

ח. בַּיּ֣וֹם הַה֗וּא יָגֵ֤ן יְהֹוָה֙ בְּעַד֙ יוֹשֵׁ֣ב יְרוּשָׁלִַם וְהָיָ֞ה הַנִּכְשָׁ֥ל בָּהֶ֛ם בַּיּ֥וֹם הַה֖וּא כְּדָוִ֑יד וּבֵ֤ית דָּוִיד֙ כֵּֽאלֹהִ֔ים כְּמַלְאַ֥ךְ יְהֹוָ֖ה לִפְנֵיהֶֽם׃

ט. וְהָיָ֖ה בַּיּ֣וֹם הַה֑וּא אֲבַקֵּ֗שׁ לְהַשְׁמִיד֙ אֶת כׇּל הַגּוֹיִ֔ם הַבָּאִ֖ים עַל יְרוּשָׁלִָם׃

רוח חן ותחנונים על בית דוד וירושלים, והמספד הגדול כמספד הדדרימון

י. וְשָׁפַכְתִּי֩ עַל בֵּ֨ית דָּוִ֜יד וְעַ֣ל יוֹשֵׁ֣ב יְרוּשָׁלִַם ר֤וּחַ חֵן֙ וְתַ֣חֲנוּנִ֔ים וְהִבִּ֥יטוּ אֵלַ֖י אֵ֣ת אֲשֶׁר דָּקָ֑רוּ וְסָפְד֣וּ עָלָ֗יו כְּמִסְפֵּד֙ עַל הַיָּחִ֔יד וְהָמֵ֥ר עָלָ֖יו כְּהָמֵ֥ר עַֽל הַבְּכֽוֹר׃

יא. בַּיּ֣וֹם הַה֗וּא יִגְדַּ֤ל הַמִּסְפֵּד֙ בִּיר֣וּשָׁלַ֔͏ִם כְּמִסְפַּ֥ד הֲדַד רִמּ֖וֹן בְּבִקְעַ֥ת מְגִדּֽוֹן׃

המספד נערך משפחה משפחה בנפרד, מבית דוד ולוי ועד כולן, והנשים לבד

יב. וְסָפְדָ֣ה הָאָ֔רֶץ מִשְׁפָּח֥וֹת מִשְׁפָּח֖וֹת לְבָ֑ד מִשְׁפַּ֨חַת בֵּית דָּוִ֤יד לְבָד֙ וּנְשֵׁיהֶ֣ם לְבָ֔ד מִשְׁפַּ֤חַת בֵּית נָתָן֙ לְבָ֔ד וּנְשֵׁיהֶ֖ם לְבָֽד׃

יג. מִשְׁפַּ֤חַת בֵּית לֵוִי֙ לְבָ֔ד וּנְשֵׁיהֶ֖ם לְבָ֑ד מִשְׁפַּ֤חַת הַשִּׁמְעִי֙ לְבָ֔ד וּנְשֵׁיהֶ֖ם לְבָֽד׃

יד. כֹּ֗ל הַמִּשְׁפָּחוֹת֙ הַנִּשְׁאָר֔וֹת מִשְׁפָּחֹ֥ת מִשְׁפָּחֹ֖ת לְבָ֑ד וּנְשֵׁיהֶ֖ם לְבָֽד׃