עמוס פרק א - פסוקים בטעמים ופירוש משולב

עמוס פרק א: דִּבְרֵ֣י עָמ֔וֹס אֲשֶׁר הָיָ֥ה בַנֹּקְדִ֖ים מִתְּק֑וֹעַ אֲשֶׁר֩ חָזָ֨ה עַל יִשְׂרָאֵ֜ל בִּימֵ֣י עֻזִּיָּ֣ה מֶלֶךְ יְהוּדָ֗ה וּבִימֵ֞י יָרׇבְעָ֤ם בֶּן יוֹאָשׁ֙ מֶ֣לֶךְ יִשְׂרָאֵ֔ל...

הפסוקים

א. דִּבְרֵ֣י עָמ֔וֹס אֲשֶׁר הָיָ֥ה בַנֹּקְדִ֖ים מִתְּק֑וֹעַ אֲשֶׁר֩ חָזָ֨ה עַל יִשְׂרָאֵ֜ל בִּימֵ֣י עֻזִּיָּ֣ה מֶלֶךְ יְהוּדָ֗ה וּבִימֵ֞י יָרׇבְעָ֤ם בֶּן יוֹאָשׁ֙ מֶ֣לֶךְ יִשְׂרָאֵ֔ל שְׁנָתַ֖יִם לִפְנֵ֥י הָרָֽעַשׁ׃

ב. וַיֹּאמַ֓ר יְהֹוָה֙ מִצִּיּ֣וֹן יִשְׁאָ֔ג וּמִירוּשָׁלִַם יִתֵּ֣ן קוֹל֑וֹ וְאָֽבְלוּ֙ נְא֣וֹת הָרֹעִ֔ים וְיָבֵ֖שׁ רֹ֥אשׁ הַכַּרְמֶֽל׃

פשעי דמשק: דישת הגלעד בחרוצות ברזל, ועונשה אש בבית חזאל וגלות לקיר

ג. כֹּ֚ה אָמַ֣ר יְהֹוָ֔ה עַל שְׁלֹשָׁה֙ פִּשְׁעֵ֣י דַמֶּ֔שֶׂק וְעַל אַרְבָּעָ֖ה לֹ֣א אֲשִׁיבֶ֑נּוּ עַל דּוּשָׁ֛ם בַּחֲרֻצ֥וֹת הַבַּרְזֶ֖ל אֶת הַגִּלְעָֽד׃

ד. וְשִׁלַּ֥חְתִּי אֵ֖שׁ בְּבֵ֣ית חֲזָאֵ֑ל וְאָכְלָ֖ה אַרְמְנ֥וֹת בֶּן הֲדָֽד׃

ה. וְשָֽׁבַרְתִּי֙ בְּרִ֣יחַ דַּמֶּ֔שֶׂק וְהִכְרַתִּ֤י יוֹשֵׁב֙ מִבִּקְעַת אָ֔וֶן וְתוֹמֵ֥ךְ שֵׁ֖בֶט מִבֵּ֣ית עֶ֑דֶן וְגָל֧וּ עַם אֲרָ֛ם קִ֖ירָה אָמַ֥ר יְהֹוָֽה׃

פשעי עזה: הגליית גלות שלמה לאדום, ועונשה אבדן שארית פלשתים

ו. כֹּ֚ה אָמַ֣ר יְהֹוָ֔ה עַל שְׁלֹשָׁה֙ פִּשְׁעֵ֣י עַזָּ֔ה וְעַל אַרְבָּעָ֖ה לֹ֣א אֲשִׁיבֶ֑נּוּ עַל הַגְלוֹתָ֛ם גָּל֥וּת שְׁלֵמָ֖ה לְהַסְגִּ֥יר לֶאֱדֽוֹם׃

ז. וְשִׁלַּ֥חְתִּי אֵ֖שׁ בְּחוֹמַ֣ת עַזָּ֑ה וְאָכְלָ֖ה אַרְמְנֹתֶֽיהָ׃

ח. וְהִכְרַתִּ֤י יוֹשֵׁב֙ מֵֽאַשְׁדּ֔וֹד וְתוֹמֵ֥ךְ שֵׁ֖בֶט מֵֽאַשְׁקְל֑וֹן וַהֲשִׁיב֨וֹתִי יָדִ֜י עַל עֶקְר֗וֹן וְאָֽבְדוּ֙ שְׁאֵרִ֣ית פְּלִשְׁתִּ֔ים אָמַ֖ר אֲדֹנָ֥י יֱהֹוִֽה׃

פשעי צור: הסגרת גולים לאדום ושכחת ברית אחים, ועונשה אש בחומותיה

ט. כֹּ֚ה אָמַ֣ר יְהֹוָ֔ה עַל שְׁלֹשָׁה֙ פִּשְׁעֵי צֹ֔ר וְעַל אַרְבָּעָ֖ה לֹ֣א אֲשִׁיבֶ֑נּוּ עַֽל הַסְגִּירָ֞ם גָּל֤וּת שְׁלֵמָה֙ לֶאֱד֔וֹם וְלֹ֥א זָכְר֖וּ בְּרִ֥ית אַחִֽים׃

י. וְשִׁלַּ֥חְתִּי אֵ֖שׁ בְּח֣וֹמַת צֹ֑ר וְאָכְלָ֖ה אַרְמְנוֹתֶֽיהָ׃

פשעי אדום: רדיפת אחיו בחרב ונטירת עברה, ועונשו אש בתימן ובצרה

יא. כֹּ֚ה אָמַ֣ר יְהֹוָ֔ה עַל שְׁלֹשָׁה֙ פִּשְׁעֵ֣י אֱד֔וֹם וְעַל אַרְבָּעָ֖ה לֹ֣א אֲשִׁיבֶ֑נּוּ עַל רׇדְפ֨וֹ בַחֶ֤רֶב אָחִיו֙ וְשִׁחֵ֣ת רַחֲמָ֔יו וַיִּטְרֹ֤ף לָעַד֙ אַפּ֔וֹ וְעֶבְרָת֖וֹ שְׁמָ֥רָהֿ נֶֽצַח׃

יב. וְשִׁלַּ֥חְתִּי אֵ֖שׁ בְּתֵימָ֑ן וְאָכְלָ֖ה אַרְמְנ֥וֹת בׇּצְרָֽה׃

פשעי בני עמון: ביקוע הרות הגלעד, ועונשם אש ברבה וגלות המלך

יג. כֹּ֚ה אָמַ֣ר יְהֹוָ֔ה עַל שְׁלֹשָׁה֙ פִּשְׁעֵ֣י בְנֵֽי עַמּ֔וֹן וְעַל אַרְבָּעָ֖ה לֹ֣א אֲשִׁיבֶ֑נּוּ עַל בִּקְעָם֙ הָר֣וֹת הַגִּלְעָ֔ד לְמַ֖עַן הַרְחִ֥יב אֶת גְּבוּלָֽם׃

יד. וְהִצַּ֤תִּי אֵשׁ֙ בְּחוֹמַ֣ת רַבָּ֔ה וְאָכְלָ֖ה אַרְמְנוֹתֶ֑יהָ בִּתְרוּעָה֙ בְּי֣וֹם מִלְחָמָ֔ה בְּסַ֖עַר בְּי֥וֹם סוּפָֽה׃

טו. וְהָלַ֥ךְ מַלְכָּ֖ם בַּגּוֹלָ֑ה ה֧וּא וְשָׂרָ֛יו יַחְדָּ֖ו אָמַ֥ר יְהֹוָֽה׃