צפניה פרק א - פסוקים בטעמים ופירוש משולב

צפניה פרק א: דְּבַר יְהֹוָ֣ה אֲשֶׁ֣ר הָיָ֗ה אֶל צְפַנְיָה֙ בֶּן כּוּשִׁ֣י בֶן גְּדַלְיָ֔ה בֶּן אֲמַרְיָ֖ה בֶּן חִזְקִיָּ֑ה בִּימֵ֛י יֹאשִׁיָּ֥הוּ בֶן אָמ֖וֹן מֶ֥לֶךְ יְהוּדָֽה׃

הפסוקים

א. דְּבַר יְהֹוָ֣ה אֲשֶׁ֣ר הָיָ֗ה אֶל צְפַנְיָה֙ בֶּן כּוּשִׁ֣י בֶן גְּדַלְיָ֔ה בֶּן אֲמַרְיָ֖ה בֶּן חִזְקִיָּ֑ה בִּימֵ֛י יֹאשִׁיָּ֥הוּ בֶן אָמ֖וֹן מֶ֥לֶךְ יְהוּדָֽה׃

כליה על כל היקום והכרתת עובדי הבעל וצבא השמים מיהודה

ב. אָסֹ֨ף אָסֵ֜ף כֹּ֗ל מֵעַ֛ל פְּנֵ֥י הָאֲדָמָ֖ה נְאֻם יְהֹוָֽה׃

ג. אָסֵ֨ף אָדָ֜ם וּבְהֵמָ֗ה אָסֵ֤ף עוֹף הַשָּׁמַ֙יִם֙ וּדְגֵ֣י הַיָּ֔ם וְהַמַּכְשֵׁל֖וֹת אֶת הָרְשָׁעִ֑ים וְהִכְרַתִּ֣י אֶת הָאָדָ֗ם מֵעַ֛ל פְּנֵ֥י הָאֲדָמָ֖ה נְאֻם יְהֹוָֽה׃

ד. וְנָטִ֤יתִי יָדִי֙ עַל יְהוּדָ֔ה וְעַ֖ל כׇּל יוֹשְׁבֵ֣י יְרוּשָׁלִָם וְהִכְרַתִּ֞י מִן הַמָּק֤וֹם הַזֶּה֙ אֶת שְׁאָ֣ר הַבַּ֔עַל אֶת שֵׁ֥ם הַכְּמָרִ֖ים עִם הַכֹּהֲנִֽים׃ ֵ ֶ׃

ה. וְאֶת הַמִּשְׁתַּחֲוִ֥ים עַל הַגַּגּ֖וֹת לִצְבָ֣א הַשָּׁמָ֑יִם וְאֶת הַמִּֽשְׁתַּחֲוִים֙ הַנִּשְׁבָּעִ֣ים לַֽיהֹוָ֔ה וְהַנִּשְׁבָּעִ֖ים בְּמַלְכָּֽם׃

ו. וְאֶת הַנְּסוֹגִ֖ים מֵאַחֲרֵ֣י יְהֹוָ֑ה וַאֲשֶׁ֛ר לֹא בִקְשׁ֥וּ אֶת יְהֹוָ֖ה וְלֹ֥א דְרָשֻֽׁהוּ׃

יום זבח ה׳ ופקידת שרי ירושלים, סוחריה והקופאים על שמריהם

ז. הַ֕ס מִפְּנֵ֖י אֲדֹנָ֣י יֱהֹוִ֑ה כִּ֤י קָרוֹב֙ י֣וֹם יְהֹוָ֔ה כִּֽי הֵכִ֧ין יְהֹוָ֛ה זֶ֖בַח הִקְדִּ֥ישׁ קְרֻאָֽיו׃

ח. וְהָיָ֗ה בְּיוֹם֙ זֶ֣בַח יְהֹוָ֔ה וּפָקַדְתִּ֥י עַל הַשָּׂרִ֖ים וְעַל בְּנֵ֣י הַמֶּ֑לֶךְ וְעַ֥ל כׇּל הַלֹּבְשִׁ֖ים מַלְבּ֥וּשׁ נׇכְרִֽי׃

ט. וּפָקַדְתִּ֗י עַ֧ל כׇּל הַדּוֹלֵ֛ג עַל הַמִּפְתָּ֖ן בַּיּ֣וֹם הַה֑וּא הַֽמְמַלְאִ֛ים בֵּ֥ית אֲדֹנֵיהֶ֖ם חָמָ֥ס וּמִרְמָֽה׃

י. וְהָיָה֩ בַיּ֨וֹם הַה֜וּא נְאֻם יְהֹוָ֗ה ק֤וֹל צְעָקָה֙ מִשַּׁ֣עַר הַדָּגִ֔ים וִֽילָלָ֖ה מִן הַמִּשְׁנֶ֑ה וְשֶׁ֥בֶר גָּד֖וֹל מֵהַגְּבָעֽוֹת׃

יא. הֵילִ֖ילוּ יֹשְׁבֵ֣י הַמַּכְתֵּ֑שׁ כִּ֤י נִדְמָה֙ כׇּל עַ֣ם כְּנַ֔עַן נִכְרְת֖וּ כׇּל נְטִ֥ילֵי כָֽסֶף׃

יב. וְהָיָה֙ בָּעֵ֣ת הַהִ֔יא אֲחַפֵּ֥שׂ אֶת יְרוּשָׁלַ֖͏ִם בַּנֵּר֑וֹת וּפָקַדְתִּ֣י עַל הָאֲנָשִׁ֗ים הַקֹּֽפְאִים֙ עַל שִׁמְרֵיהֶ֔ם הָאֹֽמְרִים֙ בִּלְבָבָ֔ם לֹא יֵיטִ֥יב יְהֹוָ֖ה וְלֹ֥א יָרֵֽעַ׃

יג. וְהָיָ֤ה חֵילָם֙ לִמְשִׁסָּ֔ה וּבָתֵּיהֶ֖ם לִשְׁמָמָ֑ה וּבָנ֤וּ בָתִּים֙ וְלֹ֣א יֵשֵׁ֔בוּ וְנָטְע֣וּ כְרָמִ֔ים וְלֹ֥א יִשְׁתּ֖וּ אֶת יֵינָֽם׃

קרבת יום ה׳ הגדול, יום עברה וחשך שאין כסף וזהב מצילים ממנו

יד. קָר֤וֹב יוֹם יְהֹוָה֙ הַגָּד֔וֹל קָר֖וֹב וּמַהֵ֣ר מְאֹ֑ד ק֚וֹל י֣וֹם יְהֹוָ֔ה מַ֥ר צֹרֵ֖חַ שָׁ֥ם גִּבּֽוֹר׃

טו. י֥וֹם עֶבְרָ֖ה הַיּ֣וֹם הַה֑וּא י֧וֹם צָרָ֣ה וּמְצוּקָ֗ה י֤וֹם שֹׁאָה֙ וּמְשׁוֹאָ֔ה י֥וֹם חֹ֙שֶׁךְ֙ וַאֲפֵלָ֔ה י֥וֹם עָנָ֖ן וַעֲרָפֶֽל׃

טז. י֥וֹם שׁוֹפָ֖ר וּתְרוּעָ֑ה עַ֚ל הֶעָרִ֣ים הַבְּצֻר֔וֹת וְעַ֖ל הַפִּנּ֥וֹת הַגְּבֹהֽוֹת׃

יז. וַהֲצֵרֹ֣תִי לָאָדָ֗ם וְהָֽלְכוּ֙ כַּֽעִוְרִ֔ים כִּ֥י לַֽיהֹוָ֖ה חָטָ֑אוּ וְשֻׁפַּ֤ךְ דָּמָם֙ כֶּעָפָ֔ר וּלְחֻמָ֖ם כַּגְּלָלִֽים׃

יח. גַּם כַּסְפָּ֨ם גַּם זְהָבָ֜ם לֹא יוּכַ֣ל לְהַצִּילָ֗ם בְּיוֹם֙ עֶבְרַ֣ת יְהֹוָ֔ה וּבְאֵשׁ֙ קִנְאָת֔וֹ תֵּאָכֵ֖ל כׇּל הָאָ֑רֶץ כִּֽי כָלָ֤ה אַךְ נִבְהָלָה֙ יַעֲשֶׂ֔ה אֵ֥ת כׇּל יֹשְׁבֵ֖י הָאָֽרֶץ׃